Komencar studiar por exameno, cesar fumar, komencar frequentar gimnastikeyo: la tempo oportuna esas sempre la tempo venonta. Ma ajornemi ne esas nura ociemi: segun experti la reala kauzi esas altra. Yen quale on povas deskovrar li ed igar li nenociva.
Ne hodie... prefere nun! Segun nia bona intenci, balde ni devus: komencar dieto, komencar frequentar gimnastikeyo, cesar fumar... Malgre to, probable ni itere decidos ke la granda dio, la dio di nia granda chanjo, esas ajornenda... forsan morge... o nexta-semane... Experti nomas tala procedo temporiso, quo simpla-vorte signifikas ajornar omnafoye, sempre. To forsan semblas esar ulsorta ocio, ma advere ol esas mala kustumo qua ofte povas produktar problemi. Ociemeso ne suficas kom expliko. Fakte, ye la origino di singla ajorno on povas deskovrar preciza atitudi psikologial.
Unesme, la pretendo ke ante komencar laboro on mustas vartar inspiro. Irga temporisemo judikas ta bezono kom absolute justifikinda, ed esas tote neutila esforcar pruvar a lu lo kontrea. Ti qui judikas ol kom personala traito devus komprenar ke inspireso esas stando dezirinda, ma ne necesa. Se on ne povas renuncar tal deziro, on forsan ajornos tro longe sua propra devi.
Pluse, kelka personi, konvinkita ke omno esas terorigiva, tendencas ad atribuar tro multa importo ad impedivi kande koncernesas lia devi. Exemple, ti qui volas evitar la gimnastikeyo forsan judikos kom tro longa la voyo adibe. Same, en kontoro la bruiso o la muziko dil kolegi ipse semblas esar netolerebla, ed on longe ajornas la livro di sua laboruro.
Existas anke ajornemi qui irge esforcas evitar fatigeso. Li preferas jacar komfortoze en sua fotelo lektante prizata libro kam sudorifar frenezioze sur senkomforta mashino en fetida gimnastikeyo nur por mantenar sua silueto. Preferar komforto esas tote justifikinda, ma on gardez su, nam pos kelka tempo on forsan ne plus toleros irga deskomforto.
Tamen ni abundante ajornas anke kande ni sentas inspireso e tote komprenas la valoro dil rezultaji di nia laboro. To eventas precipue kande ni afrontas taski recevita de superiori, do taski obliganta: ni lentigas la laboro pro ke nekonciante ni volas revendikar nia autonomeso.
Pluse, forsan existas anke nekonciata venjo-deziro pro neyustaji eventuale subisita, o sento di neapteso qua produktas temporiso por evitar shamigo per reprochi rezultanta de eventuala erori. E la personeso ne importas!
Existas anke la perfektemo, qua senfine ajornas la livro di sua laboruro pro ke lu ne sucesas atingar rezultaji tam perfekta kam lu volus. Por evitar tal atitudo oportas ne plus pensar nur pri extrema kazi e trovar maniero exekutar la laboro dum aceptebla tempo, mem se ol restas kelke neperfekta.
Se, vice, on timas faliar, unesme oportas eskartar du impediva kredi: la kredo ke on infalible falios, e la kredo ke on mustas atingar bona rezultajo. Pos eliminir omna negativa pensi, esas plu facila montrar sua tota valoro!
Ofte eventas ke on timas suceso. Fakte, mem nekonciante, on forsan preferas erorar kam tristigar la kar amiko kun qua on studiis por la sama exameno obtenante plu bona qualifiko kam lu… O forsan on timas esar judikata kom studio-championo e konseque esar exkluzata dal maxim vivaca e do maxim amuziva kamaradi en la skolo.
Ka tu bezonas sentar tu urjata por agar maxim bone posible? Pensez pri l’importo di tua tasko e pri l’estimo da tua chefo, quan tu perdus en kazo di negativa rezultajo.
Kompatindo... nun me helpos lu! Fine, existas la personi qui tendencas a recevar kompato. Lu mustas livrar laboruro pos poka dii, ma lu komprenigas ke lu ajornos ol tro longe, quankam lu laboris tre multe. Advere, lu mem ne esforcas komencar sua laboro. Jeneroza kolego subite ofras sua helpo, ma fine ica exekutos preske la tota laboro. Se tu agas tale, eskartez omna probi luktar kontre l’ocio: tua strategio esas vera e pekuliara. Deshonesta, ma sendubite efikiva!
Por evitar temporiso, oportas trovar la psikologial motivi qui produktas singla del mencionita atitudi. Ta tasko esas tote nesimpla, nam irga ajornemo sempre tre habile trovas ula justifiko por sua ajorni.
Ka nur exkuzi o grava motivi? Per analizar la kusti e la profiti e deskovrar quo eventas kande la tasko exekutesas o ne, on sucesas dicernar grava motivi de nura exkuzi. Se on preferas la manko di inspireso kom exkuzo, oportas esforcar tenuigar sua pretendi ed irge komencar la laboro: l’inspireso dume venos. Ka vi ne komencas studiar til ke omno quieteskas cirkum vi? Deskonektez la telefonilo o donez instrucioni a via tentema amiki!
Esas certa ke la maxim insidiema enemiko di nia efikiveso esas ni ipsa! Sat efikiva metodo kontre ajornemeso esas skribar omna exkuzi quin on memoras e pose amuzar su per demonstrar lia nesustenebleso, quale se li esabus propozita da antipatiinda amiko. Do oportas agar quale advokato dil mala partiso! Evidente konvenas komencar l’exerco quik, ne morge...
